କ୍ରୋଧ

ସାମାନ୍ୟ କ୍ରୋଧ ଜୀବନର ଗତିପଥ ବଦଳାଇ ଦିଏ । କ୍ରୋଧ ମୋହଗ୍ରସ୍ତ କରାଏ ଅର୍ଥାତ୍ ହିତାହିତ ଜ୍ଞାନ ଭୁଲାଇ ଦିଏ । କର୍ତ୍ତବ୍ୟ ଅକର୍ତ୍ତବ୍ୟ ସମ୍ପର୍କରେ ଚିନ୍ତନ ନ କରି ସେ କାର୍ଯ୍ୟ କରେ । ଭଲ ଜାଣି ଥିଲେ ବି କ୍ରୋଧ ବଶତଃ ନିଷିଦ୍ଧ କର୍ମ କରି ବସେ । ପ୍ରତିଦିନ ଦୂରଦର୍ଶନ, ରେଡ଼ିଓ, ସମ୍ବାଦ ପତ୍ର ତଥା ଆଖ ପାଖ ସୂଚନାରେ ଆମେ କ୍ରୋଧର ପରିଣତି କେତେ ଭୟାବହ ତାହା ଜାଣିଛୁ ତଥା ଦେଖିଛୁ । କିନ୍ତୁ ସବୁ ଜାଣିବି ଅଜଣା ରହି ଅନ୍ୟ ଅପେକ୍ଷା ନିଜର ବେଶୀ କ୍ଷତି କରୁଛୁ । କାମ, କ୍ରୋଧ, ଲୋଭ ଏ ତିନିଟି ନରକର ଦ୍ୱାର । ତଥାପି ଆମେ ସେହି ମାର୍ଗର ପଥିକ ହେଉଛୁ । କ୍ରୋଧର ପରିଣତି କେତେ ଭୟଙ୍କର ସେ କଥା ଅନୁଭବୀ ବ୍ୟତୀତ ଅନ୍ୟ କେହି ଜାଣିବା ଅସମ୍ଭବ । ସେହି କ୍ରୋଧର ଆୟତ୍ତକୁ ଆସି କେତେ ପତି-ପତ୍ନୀ ବିଚ୍ଛେଦ, ପିତା-ପୁତ୍ରର ବିବାଦ, କେବେ ପିତା ପୁତ୍ରକୁ ତ କେବେ ପୁତ୍ର ପିତାକୁ ହତ୍ୟା । ପ୍ରତିଦିନ ସାମାଜିକ ଗଣମାଧ୍ୟମରେ କ୍ରୋଧର ପରିଣତିର ସମ୍ବାଦ, ହିଂସାତ୍ମକ ଘଟଣା, ଧର୍ମଗ୍ରନ୍ଥରେ, ନୀତିଶାସ୍ତ୍ରରେ ତଥା ଧର୍ମ ପ୍ରବଚକମାନଙ୍କ କ୍ରୋଧ ସମ୍ପର୍କରେ ସତର୍କ ସୂଚନା ମୋତେ କ୍ରୋଧକୁ ଜାଣିବା, ବୁଝିବା ଓ ତାହାଠାରୁ ଦୂରେଇ ରହିବାକୁ ପ୍ରେରଣା ଦେଲା । ମୁଁ ମୋ ଅଧ୍ୟୟନ ମଧ୍ୟରେ ଆସୁ ଥିବା ବେଦ, ଦର୍ଶନ, ଉପନିଷଦ ତଥା ବିବିଧ ଧାର୍ମିକ ଗ୍ରନ୍ଥରୁ କ୍ରୋଧ ସମ୍ପର୍କୀୟା ଅନେକ କଥା ପଢ଼ିଛି ଓ ତାକୁ ମଧ୍ୟ କେତେକାଂଶରେ ଏହି ପୁସ୍ତକରେ ଉଲ୍ଲେଖ କରିଛି । ଏହା ପାଠକଙ୍କୁ କେତେ ଆକର୍ଷିତ କରିବା ତାହା ମୁଁ କହି ପାରିବିନି, ପରନ୍ତୁ ଯଥା ଶକ୍ତି କ୍ରୋଧର କାରଣ, ଲକ୍ଷଣ, ନିରାକରଣ ସମ୍ପର୍କରେ ପ୍ରକାଶ କରିଛି । ଅନେକ ଘଟଣା ଆମ ସମ୍ମୁଖରେ ହେଉଛି ଓ ଆମେ ଦେଖୁଛୁ ସାମାନ୍ୟ କ୍ରୋଧ ପାଇଁ କିପରି ଧନ, ଜୀବନ, ସମ୍ମାନ ତଥା ଗୌରବ ଧୂଳିସାତ୍ ହେଉଛି । କ୍ରୋଧ ପରିତ୍ୟାଗ ଅତ୍ୟାବଶ୍ୟକ । ଏଥି ପାଇଁ ଉପାସନା, ଧ୍ୟାନ ଏକାନ୍ତ ଆତ୍ମଚିନ୍ତନ ଆଦି ଆବଶ୍ୟକ । ଯଥାର୍ଥ ଗୁରୁ ଚରଣରେ ବସି ନିଜର ଏହି ଦୁର୍ଗୁଣ ସମ୍ପର୍କରେ ଅବଗତ କରାଇ ସେହି ମହାତ୍ମାଙ୍କ ଉପଦେଶକୁ ଠିକ୍ ଭାବେ ପାଳନ କଲେ କ୍ରୋଧ ରୂପକ ମହାଶତ୍ରୁଠାରୁ ଆମେ ରକ୍ଷା ପାଇ ପାରିବା ।
କାମ, କ୍ରୋଧ, ଲୋଭ – ଏ ତିନିଟି ନରକର ଦ୍ୱାର । ସାମାନ୍ୟ କ୍ରୋଧ ହିତାହିତ ଜ୍ଞାନ ଭୁଲେଇ ଆମ ଜୀବନର ଗତି ପଥ ବଦଳାଇ ଦିଏ । ଧନ, ଜୀବନ, ସମ୍ମାନ ସବୁ ଧୂଳିସାତ୍ ହୁଏ । ତେଣୁ କ୍ରୋଧ ପରିତ୍ୟାଗ ସର୍ବାଦୌ ଆବଶ୍ୟକ । ନିୟମିତ ଉପାସନା, ଧ୍ୟାନ ଓ ଆତ୍ମାଚିନ୍ତାଦ୍ଵାରା ଏହା ଅବଶ୍ୟ ସମ୍ଭବ । ପୁସ୍ତକଟିରେ ବେଦ, ଦର୍ଶନ, ଉପନିଷଦ ତଥା ବିଭିନ୍ନ ଧାର୍ମିକ ଗ୍ରନ୍ଥରୁ କ୍ରୋଧ ସମ୍ପର୍କରେ ଅନେକ ତଥ୍ୟ ଓ ତତ୍ତ୍ୱ ସଂଗ୍ରହ କରି ପାଠକମାନଙ୍କ ଉଦ୍ଦେଶ୍ୟରେ ରଖା ଯାଇଛି । କ୍ରୋଧର କାରଣ, ଲକ୍ଷଣ ଓ ନିରାକରଣ ସମ୍ବନ୍ଧରେ ମଧ୍ୟ ବିଶେଷ ଉଲ୍ଲେଖ ରହିଛି ।

ମୂଲ୍ୟ : ଟ. ୧୦୦.୦୦